[71] น ปจฺฉโต คจฺฉนฺโต ปุรโต คจฺฉนฺตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

อุปฺปเถนคมนสิกฺขาปทํ

[72] น อุปฺปเถน คจฺฉนฺโต ปเถน คจฺฉนฺตสฺส อคิลานสฺส ธมฺมํ เทเสสฺสามีติ สิกฺขา กรณียาฯ

ฐิโตอุจฺจารสิกฺขาปทํ

[73] น ฐิโต อคิลาโน อุจฺจารํ วา ปสฺสาวํ วา กริสฺสามีติ สิกฺขา กรณียาฯ

หริเตอุจฺจารสิกฺขาปทํ

[74] น หริเต อคิลาโน อุจฺจารํ วา ปสฺสาวํ วา เขฬํ วา กริสฺสามีติ สิกฺขา กรณียาฯ

อุทเกอุจฺจารสิกฺขาปทํ

[75] น อุทเก อคิลาโน อุจฺจารํ วา ปสฺสาวํ วา เขฬํ วา กริสฺสามีติ สิกฺขา กรณียาฯ

ปาทุกวคฺโค สตฺตโมฯ

อุทฺทิฏฺฐา โข อายสฺมนฺโต เสขิยา ธมฺมาฯ ตตฺถายสฺมนฺเต ปุจฺฉามิ, กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายสฺมนฺโต, ตสฺมา ตุณฺหี, เอวเมตํ ธารยามีติฯ

เสขิยา นิฏฺฐิตาฯ

อธิกรณสมถา

อิเม โข ปนายสฺมนฺโต สตฺต อธิกรณสมถา

ธมฺมา อุทฺเทสํ อาคจฺฉนฺติฯ

อุปฺปนฺนุปฺปนฺนานํ อธิกรณานํ สมถาย วูปสมาย สมฺมุขาวินโย ทาตพฺโพฯ

สติวินโย ทาตพฺโพฯ

อมูฬฺหวินโย ทาตพฺโพฯ

ปฏิญฺญาย กาเรตพฺพํฯ

เยภุยฺยสิกาฯ

ตสฺสปาปิยสิกาฯ

ติณวตฺถารโกติฯ

อุทฺทิฏฺฐา โข อายสฺมนฺโต สตฺต อธิกรณสมถา ธมฺมาฯ ตตฺถายสฺมนฺเต, ปุจฺฉามิ กจฺจิตฺถ ปริสุทฺธา, ทุติยมฺปิ ปุจฺฉามิ, กจฺจิตฺถ ปริสุทฺธา, ตติยมฺปิ ปุจฺฉามิ, กจฺจิตฺถ ปริสุทฺธา, ปริสุทฺเธตฺถายสฺมนฺโต, ตสฺมา ตุณฺหี, เอวเมตํ ธารยามีติฯ

อธิกรณสมถา นิฏฺฐิตาฯ

อุทฺทิฏฺฐํ โข อายสฺมนฺโต นิทานํ,

อุทฺทิฏฺฐา จตฺตาโร ปาราชิกา ธมฺมา,

อุทฺทิฏฺฐา เตรส สงฺฆาทิเสสา ธมฺมา,

อุทฺทิฏฺฐา ทฺเว อนิยตา ธมฺมา,

อุทฺทิฏฺฐา ติํส นิสฺสคฺคิยา ปาจิตฺติยา ธมฺมา,

อุทฺทิฏฺฐา ทฺเวนวุติ ปาจิตฺติยา ธมฺมา,

อุทฺทิฏฺฐา จตฺตาโร ปาฏิเทสนียา ธมฺมา,

อุทฺทิฏฺฐา เสขิยา ธมฺมา,

อุทฺทิฏฺฐา สตฺต อธิกรณสมถา ธมฺมา, เอตฺตกํ ตสฺส ภควโต สุตฺตาคตํ สุตฺตปริยาปนฺนํ อนฺวทฺธมาสํ อุทฺเทสํ อาคจฺฉติ, ตตฺถ สพฺเพเหว สมคฺเคหิ สมฺโมทมาเนหิ อวิวทมาเนหิ สิกฺขิตพฺพนฺติฯ

วิตฺถารุทฺเทโส ปญฺจโมฯ

ภิกฺขุปาติโมกฺขํ นิฏฺฐิตํฯ

ฯ นโม ตสฺส ภควโต อรหโต สมฺมาสมฺพุทฺธสฺสฯ

ภิกฺขุนีปาติโมกฺขปาฬิ

ปุพฺพกรณํ-4