เมนู

8. ปฐมคณิกเจตาปนสิกฺขาปทวณฺณนา

อฏฺฐเม มหาชนิเกนาติ คณสฺส ปริจฺจตฺเตน, อิทเมตฺถ ฉฏฺฐโต นานากรณํฯ

ปฐมคณิกเจตาปนสิกฺขาปทวณฺณนา นิฏฺฐิตาฯ

9. ทุติยคณิกเจตาปนสิกฺขาปทวณฺณนา

นวเม สญฺญาจิเกนาติ อิทํ อฏฺฐมโต อติริตฺตํ, เสสํ ทฺวีสุปิ ฉฏฺฐสิกฺขาปทสทิสเมวาติฯ

ทุติยคณิกเจตาปนสิกฺขาปทวณฺณนา นิฏฺฐิตาฯ

10. ปุคฺคลิกเจตาปนสิกฺขาปทวณฺณนา

ทสเม ปุคฺคลิเกนาติ เอกภิกฺขุนิยา ปริจฺจตฺเตนฯ สญฺญาจิเกนาติ สยํ ยาจิตเกน จฯ อญฺญํ เจตาเปยฺยาติ ยํ อุทฺทิสิตฺวา ทินฺนํ, ตโต อญฺญํ เจตาเปนฺติยา ปโยเค ทุกฺกฏํ, ปฏิลาเภน นิสฺสคฺคิยํ โหติฯ

สาวตฺถิยํ ถุลฺลนนฺทํ อารพฺภ ตาทิเสน ปริกฺขาเรน อญฺญํ เจตาปนวตฺถุสฺมิํ ปญฺญตฺตํ, เสสํ ฉฏฺฐสทิสเมวาติฯ

ปุคฺคลิกเจตาปนสิกฺขาปทวณฺณนา นิฏฺฐิตาฯ

ปตฺตวคฺโค ปฐโมฯ

11. ครุปาวุรณสิกฺขาปทวณฺณนา

ทุติยสฺส ปฐเม ครุปาวุรณนฺติ สีตกาเล ปาวุรณํฯ จตุกฺกํสปรมนฺติ กํโส นาม จตุกฺกหาปณิโก โหติ, ตสฺมา โสฬสกหาปณคฺฆนกํฯ เจตาเปตพฺพนฺติ ฐเปตฺวา สหธมฺมิเก จ ญาตกปฺปวาริเต จ อญฺเญน กิสฺมิญฺจิเทว คุเณ ปริตุฏฺเฐน ‘‘วเทถายฺเย, เยนตฺโถ’’ติ วุตฺตาย วิญฺญาเปตพฺพํฯ ตโต เจ อุตฺตรีติ ตตุตฺตริ วิญฺญาเปนฺติยา ทุกฺกฏํ, ปฏิลทฺธํ นิสฺสคฺคิยํ โหติฯ

สาวตฺถิยํ ถุลฺลนนฺทํ อารพฺภ ราชานํ กมฺพลํ วิญฺญาปนวตฺถุสฺมิํ ปญฺญตฺตํ, ติกปาจิตฺติยํ, อูนกจตุกฺกํเส ทฺวิกทุกฺกฏํฯ ตสฺมิํ ปน อูนกสญฺญาย, จตุกฺกํสปรมํ เจตาเปนฺติยา, ญาตกปฺปวาริเต วา, อญฺญสฺส วา อตฺถาย, อตฺตโน วา ธเนน, มหคฺฆํ เจตาเปนฺตํ อปฺปคฺฆํ เจตาเปนฺติยา, อุมฺมตฺติกาทีนญฺจ อนาปตฺติฯ ครุปาวุรณตา, อติเรกจตุกฺกํสตา, อนนุญฺญาตฏฺฐาเน วิญฺญตฺติ, ปฏิลาโภติ อิมาเนตฺถ จตฺตาริ องฺคานิฯ สมุฏฺฐานาทีนิ สญฺจริตฺตสทิสานีติฯ

ครุปาวุรณสิกฺขาปทวณฺณนา นิฏฺฐิตาฯ

12. ลหุปาวุรณสิกฺขาปทวณฺณนา

ทุติเย ลหุปาวุรณนฺติ อุณฺหกาเล ปาวุรณํฯ อฑฺฒเตยฺยกํสปรมนฺติ ทสกหาปณคฺฆนกํ, เสสํ ปฐมสทิสเมวาติฯ

ลหุปาวุรณสิกฺขาปทวณฺณนา นิฏฺฐิตาฯ

อิโต ปรานิ อิมสฺมิํ วคฺเค อฏฺฐ, ตติยวคฺเค ทสาติ อิมานิ อฏฺฐารส สิกฺขาปทานิ ภิกฺขุปาติโมกฺขวณฺณนายํ วุตฺตนเยเนว เวทิตพฺพานีติฯ

ชาตรูปวคฺโค ตติโยฯ

อุทฺทิฏฺฐา โข อยฺยาโย ติํส นิสฺสคฺคิยา ปาจิตฺติยา ธมฺมาติ ภิกฺขู อารพฺภ ปญฺญตฺตา สาธารณา อฏฺฐารส, อสาธารณา ทฺวาทสาติ เอวํ ติํสฯ เสสํ สพฺพตฺถ อุตฺตานเมวาติฯ

กงฺขาวิตรณิยา ปาติโมกฺขวณฺณนาย ภิกฺขุนิปาติโมกฺเข

นิสฺสคฺคิยปาจิตฺติยวณฺณนา นิฏฺฐิตาฯ

ปาจิตฺติยกณฺโฑ

1. ลสุณวคฺโค