ตสฺส พหิสีมคตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติ ฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน วิปฺปกตจีวรํ สมาทาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวรํ กาเรติฯ โส กตจีวโร สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ ตสฺส ภิกฺขุโน สวนนฺติโก กถินุทฺธาโรฯ

ภิกฺขุ อตฺถตกถิโน วิปฺปกตจีวรํ สมาทาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวรํ กาเรติฯ โส กตจีวโร – ‘‘ปจฺเจสฺสํ ปจฺเจสฺส’’นฺติ พหิทฺธา กถินุทฺธารํ วีตินาเมติฯ ตสฺส ภิกฺขุโน สีมาติกฺกนฺติโก กถินุทฺธาโรฯ

ภิกฺขุ อตฺถตกถิโน วิปฺปกตจีวรํ สมาทาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวรํ กาเรติฯ โส กตจีวโร ‘‘ปจฺเจสฺสํ ปจฺเจสฺส’’นฺติ สมฺภุณาติ กถินุทฺธารํฯ ตสฺส ภิกฺขุโน สห ภิกฺขูหิ กถินุทฺธาโรฯ

ฉกฺกํฯ

วิปฺปกตสมาทายปนฺนรสกํ นิฏฺฐิตํฯ

อาทายภาณวาโรฯ

195. อนาสาโทฬสกํ

[318] ภิกฺขุ อตฺถตกถิโน จีวราสาย ปกฺกมติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติฯ ตสฺส พหิสีมคตสฺส เอวํ โหติ – ‘‘อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติ ฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘น ปจฺเจสฺส’’นฺติฯ ตสฺส พหิสีมคตสฺส เอวํ โหติ – ‘‘อิเธวิมํ จีวราสํ ปยิรุปาสิสฺส’’นฺติฯ โส ตํ จีวราสํ ปยิรุปาสติ ฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺสนฺติ, น ปนสฺส โหติ – ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ

อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ ตสฺส พหิสีมคตสฺส เอวํ โหติ – ‘‘อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

อนาสาโทฬสกํ [อนาสาทฺวาทสกํ (สี.)] นิฏฺฐิตํฯ

196. อาสาโทฬสกํ

[319] ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ ตสฺส พหิสีมคตสฺส เอวํ โหติ – ‘‘อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ ตสฺส เอวํ โหติ – ‘‘ยโต ตสฺมิํ อาวาเส อุพฺภตํ กถินํ, อิเธวิมํ จีวราสํ ปยิรุปาสิสฺส’’นฺติฯ โส ตํ จีวราสํ ปยิรุปาสติฯ อาสาย ลภติ , อนาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ ตสฺส เอวํ โหติ – ‘‘ยโต ตสฺมิํ อาวาเส อุพฺภตํ กถินํ, อิเธวิมํ จีวราสํ ปยิรุปาสิสฺส’’นฺติฯ โส ตํ จีวราสํ ปยิรุปาสติฯ อาสาย ลภติ, อนาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ

ตสฺส เอวํ โหติ – ‘‘ยโต ตสฺมิํ อาวาเส อุพฺภตํ กถินํ, อิเธวิมํ จีวราสํ ปยิรุปาสิสฺส’’นฺติฯ โส ตํ จีวราสํ ปยิรุปาสติฯ อาสาย ลภติ, อนาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ ตสฺส เอวํ โหติ – ‘‘ยโต ตสฺมิํ อาวาเส อุพฺภตํ กถินํ, อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ โส ตํ จีวรํ กาเรติฯ โส กตจีวโร สุณาติ – ‘‘อุพฺภตํ กิร ตสฺมิํ อาวาเส กถิน’’นฺติฯ ตสฺส ภิกฺขุโน สวนนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ โส ตํ จีวรํ กาเรติฯ โส กตจีวโร ‘‘ปจฺเจสฺสํ ปจฺเจสฺส’’นฺติ – พหิทฺธา กถินุทฺธารํ วีตินาเมติฯ ตสฺส ภิกฺขุโน สีมาติกฺกนฺติโก กถินุทฺธาโรฯ

ภิกฺขุ อตฺถตกถิโน จีวราสาย ปกฺกมติ ‘‘ปจฺเจสฺส’’นฺติฯ โส พหิสีมคโต ตํ จีวราสํ ปยิรุปาสติฯ อาสาย ลภติ, อนาสาย น ลภติฯ โส ตํ จีวรํ กาเรติฯ โส กตจีวโร ‘‘ปจฺเจสฺสํ ปจฺเจสฺส’’นฺติ – สมฺภุณาติ กถินุทฺธารํฯ ตสฺส ภิกฺขุโน สห ภิกฺขูหิ กถินุทฺธาโรฯ

อาสาโทฬสกํ นิฏฺฐิตํฯ

197. กรณียโทฬสกํ

[320] ภิกฺขุ อตฺถตกถิโน เกนจิเทว กรณีเยน ปกฺกมติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติฯ ตสฺส พหิสีมคตสฺส จีวราสา อุปฺปชฺชติฯ ตสฺส เอวํ โหติ – ‘‘อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ

ตสฺส เอวํ โหติ – ‘‘เนวิมํ จีวรํ กาเรสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺส’’นฺติฯ โส ตํ จีวรํ กาเรติฯ ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ ตสฺส เอวํ โหติ – ‘‘อิเธวิมํ จีวราสํ ปยิรุปาสิสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ โส ตํ จีวราสํ ปยิรุปาสติฯ อนาสาย ลภติ, อาสาย น ลภติฯ ตสฺส เอวํ โหติ – ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ

ตสฺส ตํ จีวรํ กยิรมานํ นสฺสติฯ ตสฺส ภิกฺขุโน นาสนนฺติโก กถินุทฺธาโรฯ

ภิกฺขุ อตฺถตกถิโน เกนจิเทว กรณีเยน ปกฺกมติ อนธิฏฺฐิเตน; เนวสฺส โหติ – ‘‘ปจฺเจสฺส’’นฺติ, น ปนสฺส โหติ – ‘‘น ปจฺเจสฺส’’นฺติฯ ตสฺส พหิสีมคตสฺส จีวราสา อุปฺปชฺชติฯ ตสฺส เอวํ โหติ – ‘‘อิเธวิมํ จีวราสํ ปยิรุปาสิสฺสํ, น ปจฺเจสฺส’’นฺติฯ โส ตํ จีวราสํ ปยิรุปาสติฯ ตสฺส สา จีวราสา อุปจฺฉิชฺชติฯ ตสฺส ภิกฺขุโน อาสาวจฺเฉทิโก กถินุทฺธาโรฯ

กรณียโทฬสกํ นิฏฺฐิตํฯ

198. อปวิลายนนวกํ

[321] ภิกฺขุ อตฺถตกถิโน ทิสํคมิโก ปกฺกมติ จีวรปฏิวีสํ อปวิลายมาโน [อปวินยมาโน (สี.), อปจินยมาโน (ก.)]ฯ ตเมนํ ทิสงฺคตํ ภิกฺขู ปุจฺฉนฺติ – ‘‘กหํ ตฺวํ, อาวุโส, วสฺสํวุฏฺโฐ, กตฺถ จ เต จีวรปฏิวีโส’’ติ? โส เอวํ วเทติ – ‘‘อมุกสฺมิํ อาวาเส วสฺสํวุฏฺโฐมฺหิฯ ตตฺถ จ เม จีวรปฏิวีโส’’ติฯ เต เอวํ วทนฺติ – ‘‘คจฺฉาวุโส, ตํ จีวรํ อาหร, มยํ เต อิธ จีวรํ กริสฺสามา’’ติฯ โส ตํ อาวาสํ คนฺตฺวา ภิกฺขู ปุจฺฉติ – ‘‘กหํ เม, อาวุโส, จีวรปฏิวีโส’’ติ? เต เอวํ วทนฺติ – ‘‘อยํ เต, อาวุโส, จีวรปฏิวีโส; กหํ คมิสฺสสี’’ติ? โส เอวํ วเทติ – ‘‘อมุกํ นาม [อมุกญฺจ (ก.)] อาวาสํ คมิสฺสามิ, ตตฺถ เม ภิกฺขู จีวรํ กริสฺสนฺตี’’ติฯ เต เอวํ วทนฺติ – ‘‘อลํ, อาวุโส, มา อคมาสิฯ มยํ เต อิธ จีวรํ กริสฺสามา’’ติฯ ตสฺส เอวํ โหติ – ‘‘อิเธวิมํ จีวรํ กาเรสฺสํ, น ปจฺเจสฺส’’นฺติฯ โส ตํ จีวรํ กาเรติฯ ตสฺส ภิกฺขุโน นิฏฺฐานนฺติโก กถินุทฺธาโรฯ

ภิกฺขุ อตฺถตกถิโน ทิสํคมิโก ปกฺกมติ…เป.… ‘‘เนวิมํ จีวรํ กาเรสฺสํ, น ปจฺเจสฺส’’นฺติฯ ตสฺส ภิกฺขุโน สนฺนิฏฺฐานนฺติโก กถินุทฺธาโรฯ